རི་འགོ་ན་སྨུག་པ་དེ།

རི་འགོ་སྨུག་པ་ཁ་བ་བཞིན་དུ་བབ།།

སྨུག་སྤྲིན་གསེང་ན་གླང་པོ་ཁྱུ་ཞིག་རྒྱུ།།

ཞོགས་པ་འདི་ནི་ཞོགས་པ་མ་ཡིན་སྟེ།།

ས་གཞི་མ་ལུས་མུན་པའི་ཕྱོགས་སུ་འདེད།།

ལྗོན་ཤིང་སྣ་ཚོགས་གཉིད་ཀྱི་ཞིང་ཁམས་འགྲིམ།།

སྨྱུག་འདབ་རྩེ་ནས་ཟིལ་བའི་ཐིགས་པ་ལྷུང་།།

ས་གཞི་ངོས་ན་ཀོང་བུ་བརྒྱད་ཅུ་བྲུས།།

རང་བྱུང་ཁམས་ཉིད་ག་ལེ་ག་ལེར་འགྱུར།།

གནམ་གྱི་རྒྱ་མོ་སྔོ་ཉམས་སྟོན་དུ་མེད།།

ཁྲི་གདུགས་ཉི་མ་འཛུམ་སྐལ་མ་ཡོད་པས།།

ནག་ཅིང་སྟུགས་པའི་ནགས་ཁྲོད་གྲུ་བཞི་ན།།

རྐང་འགོ་བལྟས་ནས་དལ་གྱིས་དལ་གྱིས་སྐྱོད།།

རྣ་གཤོག་གཉིས་ལ་ལག་མཐིལ་རེས་ཀྱིས་སྦྱར།།

ལག་པའི་སྙིམ་པར་ཁ་རླངས་ཧར་ཧར་བཏབ།།

ཕུ་ཐུང་ངོས་སུ་སྣ་ཆུ་འཛར་ར་ར།།

འཁྱགས་ཤིང་འཁྱགས་ན་འདི་འདྲ་ཡོང་རྒྱུ་གདའ།།

2017-2-9