དགུང་ལོ་བརྒྱད་ཅུ། ང་ཚོའི་བདེ་སྐྱིད།

རྒན་ལགས་ཁོང་རྣམ་པའི་བཀའ་དྲིན་ནི་གཞལ་ཐབས་བྲལ་ཞིང་བརྗོད་ན་བཤད་མི་ཚར་བའི་ལོ་རྒྱུས་དང་འབྲི་ན་རྫོགས་རྒྱུ་མེད་པའི་གཏམ་རྒྱུད་ཡོད། འོན་ཀྱང་ལོ་རྒྱུས་དང་གཏམ་རྒྱུད་གང་ཡང་བཤད་མི་དགོས་པར་ད་ལྟ་ང་ཚོའི་མིག་མདུན་དེ་རང་ན་རྒན་ལགས་རྣམ་པ་སྐུ་གཟུགས་གསལ་ཐང་དང་ཚེ་མཇུག་བདེ་སྐྱིད་ངང་སྐྱེལ་ཐུབ་པ་འདི་ང་ཚོ་ལ་མཚོན་ན་ཆེས་དགའ་སྤྲོ་དང་ཆེས་བདེ་སྐྱིད་དེ་ཡིན་ཟེར་ཆོག 

ཁྱེད་ཅག་ནི་ཁོ་བོའི་མེ་ཚེ་ལ་འོད་སྣང་སྦར་མྱོང་བའི་སྙིང་གི་སྒྲོན་མེ། ནམ་ཡང་བཀའ་དྲིན་གསག་པར་དཀའ་བའི་དྲིན་ཆེ་བ་ཤ་སྟག་ཡིན། ཁྱེད་ཅག་གིས་བཞག་པའི་"བསླབ་བྱ"དང"བཀའ་སློབ"ཡོད་ཚོད་ང་ཚོའི་ཤ་རུས་གསེང་ལ་ཟུག་ཡོད། ཤ་རུས་མཐོར་ནའང"བཀའ་སློབ"དང"བསླབ་བྱ"དེ་ཚོ་འཇིག་མི་སྲིད། 

ང་ཚོ་ལ་ས་འདིར་ཕ་མ་ཟེར་བའི་བྱམས་སྐྱོང་བཟོ་མཁན་མེད། འོན་ཀྱང་རྒན་ལགས་རྣམ་པ་ནི་སྔ་ལའང་ཕ་མའི་ཚབ་བྱས་ཡོད། ད་ལྟའང་ཕ་མའི་ཚབ་ཡིན། སླད་ནས་ཀྱང་ཕ་མའི་ཚབ་དེ་ཡིན། ང་ཚོ་ལ་དགོས་པ་ནི་རྒན་ལགས་རྣམ་པ་ཡིན། དེ་ལས་ཀྱང་ཁོང་རྣམ་པ་སྐུ་ཚེ་རིང་དུ་བརྟན་རྒྱུ་དེ་ཡིན།

དགུང་ལོ་བརྒྱད་ཅུ་ནི་མི་ཞིག་གི་མི་ཚེ་ལ་མཚོན་ན་ཧ་ཅང་ལོ་མཐོ་བའི་ཚོད་གཅིག་ལ་བཞག་ཆོག འདི་ཙམ་དུ་བཞུགས་པའང་གཅིག་ན་རྒན་ལགས་རྣམ་པའི་ཐུགས་སྐྱེད་དང་བསོད་ནམས་ལོས་ཡིན་མོད། ད་དུང་རྒྱུ་རྐྱེན་ཞིག་ཡོད་ན་རྒན་ལགས་ཚོ་ལ་ཉིན་ལྟར་ཞབས་ཕྱི་ཞུ་མཁན་ཚོས་ཞབས་ཞུ་གང་ལེགས་བྱས་པའི་འབྲས་བུ་ཞིག་ཡིན་ཆོག ད་དུང་སྨན་བཅོས་རོགས་རམ་སོགས་འཚོ་བ་ལ་རོགས་རམས་དང་གནང་མཁན་ཚོས་བཀའ་དྲིན་ཞིག་ཡིན་ཆོག

ངས་སེམས་བསམ་པའི་གཏིང་ནས་དགེ་ལགས་རྣམ་པར་ཉིན་ལྟར་ཞབས་ཕྱི་ཞུ་མཁན་ཚ་བོ་དང་ཡང་ན་དགེ་ཕྲུག་ཚོ་ལ་ཐུགས་རྗེ་ཆེ་ཞུ་རྒྱུ་དེ་ཡིན། ང་ཚོས་སྟོང་བཤད་པ་ལས་ཁྱེད་ཅག་གིས་ཉིན་གཅིག་གིས་ཞབས་ཕྱི་དེས་དགའ། དེས་ཕན། དེས་ཡག དེས་ཆོག ད་རུང་རྒན་རྣམ་པ་སྐུ་ཚེ་ཡུན་དུ་བརྟན་དགོས་པས། རྒན་རྣམ་པའི་སྐུ་ཚེ་ནི་སྐུའི་འཕྲོད་བསྟེན་ལའང་ཧ་ཅང་རག་ལོས་པས་ཞབས་ཕྱི་ཚོས་སྐུ་ཡི་འཕྲོད་བཞེས་ལ་དོ་སྣང་ཤུགས་ཆེན་གནང་རོགས། ཁྱེད་ཚོས་སྔ་བཞིན་ཞབས་ཕྱི་ཧུར་ཐག་གནང་རོགས། ང་དང་ཁྱེད། མདོར་ན་དགེ་ཕྲུག་ཡོངས་ལ་རྒན་ལགས་རྣམ་པ་ཤིན་ཏུ་ནས་མཁོ། 

____ཕྲན་སྲོང་བཙན་གྱིས་རྒན་རྣམ་པའི་བཀའ་དྲིན་ཡིད་ལ་དྲན་བཞིན་དགའ་སྐྱོ་ཟུང་འབྲེལ་ཐོག་ནས་རྟེན་འབྲེལ་མཚོན་སླད་དུ་བྲིས།  2017-3-2